▫️ Аҳәынҭқарра Ахада иқәгылараҿы иазгәеиҭеит:

▫ ️ "Ҳаҭыр зқәу аизара ду алахәцәа!

▫ ️ Акыр иаԥсоу Аԥсны аерман еидгылара ахаҭарнакцәа!

Акыр иаԥсоу аҩызцәа!

▫ ️ Бзиала шәаабеит ҳәа шәасҳәоит Аԥсны аерман уаажәларра изаамҭанытәиу аизара ду аҿы.

▫ ️ Аԥсны еснагь акультуратәи адоуҳатәи хкырацәара ҳаҭыр  ақәын, ара еиуеиԥшым амилаҭқәа иреиуаз ауаа ҭынч еицынхон. Аҳаҭыреиқәҵареи аидгылареи роуп ҳҳәынҭқарра мчыс иамоу ҳәа исыԥхьаӡоит.

▫ ️ Аерман уаажәларра Аԥсны инхоижьҭеи шәышықәса иреиҳауп. Ари аамҭа иалагӡаны аерманцәа Аԥсны ауаажәларра иахәҭакны иҟалеит, урҭ ҳтәыла аҿиараҿы рлагалагьы дууп. Аерманцәа рхеидкыла ахаҭарнакцәа еснагь, аиашазы, ирыԥсадгьылхаз Аԥсны гәыкала амаҵ руан.

▫ ️ Ҳара гәахәарала иаҳгәалаҳаршәоит Аԥсны Аџьынџьтәылатә еибашьра ашықәсқәа раан аԥсуаа жәҩахыреибыҭарала ҳтәыла ахақәиҭреи ахьыԥшымреи зыхьчоз амаршал Баграмиан ихьӡ зху абаталион аибашьцәа рфырхаҵара. Урҭ ргәымшәареи рхамеигӡареи наунагӡа Аԥсны аҭоурых аҟны инхоит.

▫ ️ Ҷыдала иҭабуп ҳәа иасҳәарц сҭахуп Аԥсны аерман еидгылара анапхгаҩы Алик Арутиун-иԥа Минасиан. Активла, ҭакԥхықәрала иусура, иара убас амилаҭбжьаратә еизыҟазаашьақәа рырӷәӷәаразы иааиԥмырҟьаӡакәа иусура аҳаҭырқәҵара иаԥсоуп. Иара иааԥсара иабзоураны аерман уаажәларра аҿиара иаҿуп, атәыла ауаажәларратә ԥсҭазаараҿы аҵакы змоу алагалагьы ҟанаҵоит.

▫ ️ Иахьа ҳара ихьыԥшым аԥсуа ҳәынҭқарра аргылара ҳаҿуп. Аҵак дуӡӡа змоу ари аус  ҳалахәуп ҳара зегьы — Аԥсны жәлар, амилаҭеилыхрада, динхаҵарас иныҟәыргозаалак. Ҳара ҳаиднакылоит Аԥсны абзиабара, ҳхәыҷқәа рзы иаԥсоу аԥеиԥш аргылара аус.

▫️ Агәра ганы сыҟоуп аерман уаажәларра аринахысгьы ҳреспубликаҿы аҳәынҭқарреи, ауаажәларратә еизыразреи, аҭышәынтәалареи рырӷәӷәараҿы алагала шыҟало.

▫ ️ Аизара ду алахәцәа гәык ԥсыкала ирзеиӷьасшьоит хра злоу аусуреи, акзаареи, Ҳаԥсадгьыл Аԥсны аизҳазыӷьараҿы ақәҿиара ҿыцқәеи.