Аусмҩаԥгатә иара убас ихы алаирхәит Нижни Новгород ақалақь ахада Иури Шалабаев.

Аныҳәатә церемониаҿы дықәгылеит Аҳәынҭқарра Ахада Иадминистрациа Анапхгаҩы Беслан Ешба. Иазгәеиҭеит апроект аус адулара ишалагаз 2025 шықәса цәыббрамзазы. Уи анагӡара аиҿкаареи ахылаԥшреи рзы Аԥсны Ахада Бадра Гәынба 2026 шықәса лаҵарамза 14 рзы Аҳәынҭқарратә комиссиа аԥҵаразы адҵа ҭижьит.

Беслан Ешба инаҵшьны иазгәеиҭеит ҳаамҭазтәи аинтерактивтә експозициа аԥҵара шалыршахаз аԥснытәии урыстәылатәии аганқәа русеицуреи, акультуратә аԥшьгарақәа рзы Ахада ифонд адгылареи, Нижни Новгород — Аҟәа аиашьаратә қалақь ацхыраареи ирыбзоураны.

Аҳәынҭқарра Ахада Иадминистрациа Анапхгаҩы иҭабуп ҳәа реиҳәеит акультуратә аԥшьгарақәа рзы Ахада ифонд, Нижни Новгород ақалақь ахадара, хаҭала ақалақь ахада Иури Шалабаев, иара убас апроект анагӡара иалахәыз урыстәылатәии аԥснытәии аспециалистцәа.

Аекспозициа ҿыц аҿы ицәыргоуп 1992-1993 шықәсқәа рызтәи Аԥсны Аџьынџьтәылатә еибашьра афырхацәеи Аԥсны аҳәынҭқарра Актәи Ахада Владислав Григори-иԥа Арӡынбеи ирызку ҳаамҭазтәи ацифратәи амультимедиатәи ӡбамҭақәа, аинтерактивтә ҷыдарақәа, аҭоурыхтә материалқәа.