Адәныҟатәи Аусқәа рминистр Олег Барцыц Ахада Бадра Гәынба изеиҭеиҳәеит Москваҟа иусуратә ныҟәарақәа рылҵшәеи Урыстәылатәи Афедерациа Адәныҟатәи Аусқәа рминистр Сергеи Лаврови реиԥылареи ртәы.
Олег Барцыц иажәақәа рыла, аиԥылара мҩаԥысит аконструктивтәи аиҩызаратәи ҟазшьа аҭаны. Аганқәа мҽхакы ҭбаала азҵаарақәа ирылацәажәеит, иара убас жәларбжьаратәи арена аҟны реизыҟазаашьақәа ирзааҭгылеит.
Аиԥылара аҳәаақәа ирҭагӡаны Аԥсны Аҳәынҭқарра атәылауаа рзакәан интересқәеи рзинмчқәеи ирыдҳәалаз азҵаарақәа ирылацәажәеит. Ахәҭакахьала, урыстәылатәи иреиҳау аҵараиурҭақәа рҟны аҵара зҵо аԥсуа студентцәа арратә хәаԥшра рықәгылара азҵаара, Аԥсны атәылауаа Урыстәыла рыҟазаара аҿҳәара 180 мшы рҟынӡа ацҵара, иара убас ҩтәылауаҩшәҟәык змоу ауаа аҳәынҭқарратә ҳәаа шәҟәык ала ахысра, иаҳҳәозар Аԥсны Аҳәынҭқарра амилаҭтә тәылауаҩшәҟәы ала.
Аминистр излазгәеиҭаз ала, излацәажәаз азҵаарақәа зегьы рыла ргәаанагарақәа еимырдеит. Урҭ зегьы русура ҳәаақәҵахоит аҩ-ганктәи реицәажәарала.
Хазы Олег Барцыц Ахада адырра ииҭеит Урыстәылатәи адгьылҵакыраҿы иҟоу Аԥсны атәылауаа иуадаҩу азинтә ҭагылазаашьа анроуа амзызқәа ртәы. Иазааҭгылан Иракли Бжинава иус, урыстәылатәи аусҭҵааҩцәа рнапаҵаҟа иҟоу.
Аминистр иажәақәа рыла, аԥсуа ган адгылара анаҭоит урыстәылатәи рколлегацәеи дареи реимадара, иара убас атәылауаҩ иуацәеи иадвокатцәеи рыҽрымардоит. Ааигәа имҩаԥысит Иракли Бжинавеи аконсултә еилазаареи реиԥылара, иани иареи реиқәшәара, ус еиԥш азин ҟанаҵеит Урыстәылатәи Афедерациа.
Аминистр иазгәеиҭеит, иӡбамкәа иҟоу азҵаарақәа шыҟоу, урҭ Урыстәылатәи Афедерациа азинмчратә органқәа рпрерогативоуп, аԥсуа ган уи ҳаҭырла иазнеиуеит. "Шәара иҟашәҵаз адҵала арҭ азҵаарақәа зегьы аус рыдулара мҩаԥысуеит", - иҳәеит аминистр.
Сергеи Лавров иԥылараҟны ирзааҭгылан адәныҟатәи аполитика акоординациеи жәларбжьаратәи аимадарақәеи рырҭбаара, урҭ рхыԥхьаӡараҟны Африка, Ааигәатәи Мрагылара, Азиа атәылақәеи Аԥсни реимадара. Олег Барцыц иазгәеиҭеит, Урыстәыла Адәныҟатәи Аусқәа рминистрра, хаҭала Сергеи Лавров, жәларбжьаратәи аимадарақәа рыҿиара ахырхарҭала Аԥсны ганрацәала адгылара шарҭо.
Амнистр иҳәеит, жьҭаарамза анҵәамҭазы жәларбжьаратәи афорум "Урыстәыла-Африка" ихы шалаирхәуа, уаҟа иазгәаҭан ишимоу аиԥыларақәа жәпакы рымҩаԥгара, иара убас аимадара ҿыцқәа рышьақәыргылара.
Адәныҟатәи Аусқәа рминистр иажәахә дазыӡырҩны, Ахада иазгәеиҭеит,Урыстәылатәи Афедерациеи ҳареи иҳабжьоу астратегиатәи аусеицуратәи еизыҟазаашьақәа рҵаки урҭ аԥхьаҟа рырӷәӷәареи.
Аҳәынҭқарра Ахада Адәныҟатәи Аусқәа рминистр идиҵет Урыстәыла иҟоу Аԥсны атәылауаа рызҵаара иадҳәалоу аусура иациҵарц, Москвеиԥш, егырҭ аҳәынҭқаррақәа рҟны иахәҭоу азинтә дгылара ааирԥшырц.
Бадра Гәынба иазгәеиҭеит, аусурақа зегьы Урыстәылатәи Афедерациа азакәантә шьаҭа аманы имҩаԥыслар шакәу, иара убас жәларбжьаратәи аконструктивтә еиҿцәажәарақәа рҳәаақәа ирҭагӡаны.