Аԥсны Аҳәынҭқарра Ахада Гәынба Бадра Аԥсны жәлар Қьырса ныҳәа лаша рыдиныҳәалеит.
Ҳаҭыр зқәу ҳауаажәлар!
Аԥсны иқәынхо аиашхаҵаратә қьырсианцәа зегьы ирыдысныҳәалоит Қьырса ныҳәа ду!
Жәытә-натә аахыс Иаса Қьырса Иира амш аҽны адунеи зегь аҿы еиԥш, Кьырса аныҳәа аԥсуаа ҷыдала иазгәарҭон, ныҳәа дууп ҳәа иԥхьаӡаны.
Ари аныҳәаан аҳаҭыреиқәҵара, аҳәоуеиқәшәара, иузааигәоу бзиа ибара, агәаартра реиԥш иҟоу иреиӷьу ауаҩытәҩсатә ҟазшьақәа ртәы даҽазныкгьы ҳрыздырхәыцуеит. Қьырса аныҳәа даҽа аамҭанык иеиԥшымкәа, ауаа еиднакылоит, реибабара, реизыразра шьақәнарӷәӷәоит.
Гәык-ԥсык ала абри аҽны Аԥсны жәлар зегьы ирзеиӷьасшьар сҭахуп агәабзиара, аҭынчра, ахирра. Қьырса ныҳәа иацны инеиааит шәыҩнаҭақәа рыҟны ахҭыс бзиақәа, анасыԥ, аԥеиԥш бзиа агәрагара.
Ҽааныбзиала шәнеилааит!