Аиԥылара мҩаԥысит Уфа иҟоу Евразиатәи аҭҵаадырратә центр Аҵараиурҭабжьаратәи астуденттә кампус ахыбраҿы.

Аиԥылара алагамҭазы Ареспублика Башкорҭосҭан Аиҳабыра Аԥыза-министр Андреи Назаров иазгәеиҭеит ареспубликазы Аԥсны аус ацура арҿиара иамоу аҵак ду. Уи иажәақәа рыла, Башкорҭосҭани Аԥсни реимадара аҭоурыхтә шьаҭа ҵаулақәа амоуп, иахьа инеиԥынкыланы аҿиара иаҿуп ахырхарҭақәа жәпакы рыла — агуманитартәи аҵаратәи еимадарақәа инадыркны атуризми, аекономикеи, ацифраркратә проектқәеи, егьырҭ аусхкқәеи рҟынӡа.

Аҳәынҭқарра Ахада Бадра Гәынба иазгәеиҭеит Аԥсни Башкорҭосҭани рыжәларқәа акыр шықәса раахыс алҵшәа бзиа змоу аизыҟазаашьақәа шрыбжьоу, урҭ ишалдыршо иахьа ҩ-республикак русеицура арҭбаара.

Ахәынҭқарра Ахада Башкорҭосҭан анапхгара иҭабуп ҳәа реиҳәеит ишьақәдыргылаз аизыҟазаашьақәа рырҿиаразы. Аусеицура мҩаԥысуеит атуризми, аинфраструктуреи, атранспорти, аҿартә политикеи русхкқәа рыла. Ареспубликақәа рыбжьара атауареикәыршара иацлеит, акрызҵазкуа шьаҿаны иҟалеит Аҟәеи Уфеи рыбжьара ишиашоу аҳаиреимадара ахьхацыркхаз.

Бадра Гәынба ҷыдала иҭабуп ҳәа ахиҳәааит Аҟәа аԥшаҳәеи уи иаԥну апарктә зонеи реиҭашьақәыргылараҿы иҟарҵаз адгыларазы.

Бадра Гәынба иажәақәа рыла, Аԥсны жәларбжьаратәи аусеицура ахырхарҭа хадақәа ируакуп Урыстәылатәи Афедерациеи Аԥсни рыбжьара иҷыдоу аимадарақәа рышьақәыргылара. Атәыла Ахада инаҵшьны иазгәеиҭеит Аԥсны арҭ аизыҟазаашьақәа ахә ҳаракны ишыршьо, рырӷәӷәара ишьҭоуо, урыстәылатәи арегионқәа ишиашоу аус рыцурагьы уахь иналаҵаны.

Аԥсны Ахада иазгәеиҭеит Башкорҭосҭан ибеиоу атрадициақәеи адинамикатә ҿиареи реилагӡара, реицыҿиара шымҩаԥысуа,  изҭааз акампус лабҿаба ишаанарԥшуа арегион алшара ду, уи аусура алҵшәақәа хымԥада аԥхьаҟа уаҩы ибартә ишыҟало.

Бадра Гәынба инаҵшьны иазгәеиҭеит Башкорҭосҭан аихьӡарақәа аԥсуа жәлар гәахәарала ишрыдыркыло.

Иара убас, Аӡиас Белаиа ахықәан аҟәатәи амшын аԥшаҳәаҟны иҟоу  аколоннада  аиԥш зеиԥшу ашьақәыргылара Аԥсни Башкорҭосҭани руааԥсыра реизҳазыӷьара ахьӡала ԥхьаҟагьы иҿиало аиашьаратә еизыҟазаашьақәа рырӷәӷәара иасимволны иҟалеит.

Аиԥылара алахәцәа иддырбеит Аԥсны, уи аекономикатәи атуристтәи, аинвестициатә лшарақәа, еиуеиԥшым аусхкқәа рыҿиашьа иазку афильм.

Аԥсны Аԥыза-министр Ихаҭыԥуаҩ Џьансыхә Нанба ареспублика асоциал-економикатә ҿиара ахырхарҭа хадақәа, аусутә еимадарақәа рырҭбаареи еицырзеиԥшу апроектқәа рынагӡареи рзы иҟоуалшарақәа дрылацәажәеит.

Имҩаԥысит аусеицура ԥхьаҟатәи аҿиара азҵаарақәа рзы агәаанагарақәа реимдара. Аиԥылара иалахәыз рганахьала азҵаарақәа жәпакы рҭакқәа ҟарҵеит аҳәынҭқарра Ахада Бадра Гәынбеи аԥснытәи аделегациа алахәцәеи.