▫️ Афымцамчтә усхк анапхгаҩцәа аҳәынҭқарра Ахада адырра ирҭеит афымцамчсистема уажәтәи аҭагылазаашьеи аӡынра аҽазыҟаҵаразы имҩаԥырго ауснагӡатәқәеи ртәы.
▫️ Афымцамч ахархәара аусбарҭа аиҳабы Саид Блабба иҳәеит, Ахада идҵа инақәыршәаны афымцамч ашәҟәы аҭагаларазы априборқәа рышьақәыргылара ишаҿу. Иахьазы 26 нызқь рҟынӡа прибор шьақәыргылоуп.
▫️ Апрограмма ҩ-аамҭахәакны инагӡахоит: раԥхьа аҳасаббаратә приборқәа ықәдыргылоит аҩнеихагылақәа рҿы, анаҩс аусурақәа мҩаԥгахоит ахатәы сектор аҿы. Аамҭакала аҩнеихагылақәа рҿы аҩныҩныҵҟатәи афымцамҩангагақәа рыԥсахра азԥхьагәаҭоуп. Иахьазы апрограмма ари ахәҭа 52 процент рҟынӡа инагӡоуп.
▫️Саид Блабба иара убас иазгәеиҭеит анаплакы аус ацураан зфункционалтә лшарқәа ҭбаау амобилтә ԥшьы «Амшынеиқәафымцамч» атәылауаа рзы ишыманшәалоу.
▫️Блабба иазгәеиҭеит иалкаау ауадаҩрақәа шцәырҵуа афымцацәаҳәақәа рӷьырак рҭагылазаашьа ахьҽеим ақыҭақәа рҿы. Урҭ «Амшынеиқәафымцамч " амчала рыԥсахра мҩаԥысуеит. Убри аан аусурақәа рымҽхак ахьырацәоу иахҟьаны апрограмма инагӡаны ахыркәшара
ҳазҭоу ашықәс нҵәаанӡа изалыршахом. Аусурақәа ирыцҵахоит иааиуа ашықәс азы, уи азы иаҭаху аԥаратә хархәагақәа азԥхьагәаҭоуп.
▫️ Аҭагылазаашьа шеиӷьхаз азгәаҭоуп ахархәара змоу афымцамч ахә ахшәаара азҵаараҿгьы. Аҵыхәтәантәи амза аихшьалақәа рыла ашәатәқәа реизгара иартәеит 70 процент рҟынӡа.
▫️ Аҳәынҭқарра Ахада инаҵшьны иазгәеиҭеит афымцамч аҳасаббаратә приборқәа рышьақәыргылара аҳәынҭқарра ҷыдала хшыҩзышьҭра шанаҭо. Бадра Гәынба иазгәеиҭеит атәылақәа жәпакы рҿы аԥхьаӡагақәа рышьақәыргыларазы ахарџьқәа дара атәылауаа рхы ишадырҵо, аха Аԥсны анапхгара ауааԥсыра рфинанстә ҭагылазаашьа ҳасаб азуны, аӡбамҭа рыдыркылеит арҭ ахарџьқәа рхахьы иргарц.
▫️ Ахада иара убас иазгәеиҭеит аҳасаббаратә приборқәа рышьақәыргылара аҿагыларақәагьы шыҟоу. Уи иажәақәа рыла, ас еиԥш ахымҩаԥгашьа атәыла афымцамчсистема зегьы аҭышәныртәалара ишаԥырхагоу.
▫ ️ «Ари даара хәарҭара злоу системоуп, ашәатәқәа рылхра аизырҳаразы мацара акәӡам изалагалоу. Уи иалнаршоит афыцамч аиҷаҳарагьы, аҳасаббарагьы, раԥхьа иргыланы ҳҳәынҭқарра афымцамчтә шәарҭадара алнаршоит», — ҳәа инаҵшьны иазгәеиҭеит Бадра Гәынба.
▫️ Аҳәынҭқарра Ахада «Амшынеиқәафымцамч» анапхгара рнапы ианиҵеит аинформациа-еилыркааратә усура арӷәӷәара, аԥхьаӡагатә приборқәа рышьақәыргылара шхымԥадатәиу атәылауаа рызнагара, ареспублика афымцамчтә шәарҭадара аиҿкааразы ари апрограмма иамоу аҵакы реилыркаара.
▫ «Аӡынра аҽазыҟаҵара иазкны Ареспубликатә унитартә наплакы «Амшынеиқәафымцамч» адиректор хада Ҭемыр Џьынџьал иҳәеит Урыстәылатәи Афедерациаҟынтә акоммерциатә шьаҭала афымцамч аахәареи аагареи рызҵааразы «Интер РАО» заанаҵтәи аиҿцәажәарақәа шымҩаԥысуа атәы.
▫️ Уи иажәақәа рыла, аагарақәа хымԥадатәиуп Егрытәи аӡеизакырҭаҿы аӡы аҩаӡара аиқәырхареи аӡынра алагамҭазы уи иахьынӡахәҭоу ахарҭәаара алыршареи рзы.
▫️ Иахьазы аӡеизакырҭаҿы аӡы аҩаӡара 510 метра иҟоуп. Ари зынагӡара алыршахо азы иреиҳау дыргоуп. Убри инаваргыланы ахьҭақәа аныҟалалак, Аԥсны афымцамч ахархәара акыр аизҳара иазыԥшуп, уи аӡы аҩаӡара ланарҟәуеит.
▫️ Иаҭахханы иҟалар, Урыстәылантәи акоммерциатә фымцамч аагара иалагар алшоит цәыббрамза аҩбатәи азбжазы, иацҵахар алшоит жьҭаарамзеи, абҵарамзеи, ԥхынҷкәыни рызгьы.
▫️ Ҭемыр Џьынџьал иазгәеиҭеит ҳазҭоу ашықәс нҵәаанӡа «Амшынеиқәафымцамч» аспециалистцәа анаплакы атехникатәи афинанстәи лшарақәа ранализ шымҩаԥыргаз. Уи иажәақәа рыла, агәыӷра ыҟоуп ашықәс нҵәаанӡа фымцамчла аиқәыршәара азҵаара аӡбара алыршахап ҳәа «Амшынеиқәафымцамч» алшарақәа рҳәаа иҭагӡаны.