Ҳаҭыр зқәу афорум алахәцәа! Акыр иаԥсоу аҩызцәа!
Ахыркәшарахь инеиуеит ҵакыла ибеиаз, алҵшәа бзиақәа аазырԥшыз жәларбжьаратәи аекономикатә форум "Аԥсны - аԥеиԥш аинвестициа алагалара" амшқәа.
Арҭ амшқәа рзы, асекциақәеи астол гьежьқәеи рыҩныҵҟа имҩаԥысит хра злоу адискуссиақәа, иеиҿкаан ацәыргақәҵатә експозициақәа, имҩаԥган аустә еиԥыларақәа, аиҿцәажәарақәа.
Гәык-ԥсык ала иҭабуп ҳәа расҳәарц сҭахуп афорум аусура зхы алазырхәыз зегьы, аусеицуреи аустә еимадарақәа рырӷәӷәареи рус ацхрааразы аҭагылазаашьа ԥшааны Аԥсныҟа иааз.
Ҷыдала иҭабуп ҳәа расҳәоит урыстәылатәи аделегациа анапхгаҩы - Урыстәылатәи Афедерациа Ахада Иадминистрациа Анапхгаҩы Актәи ихаҭыԥуаҩ Сергеи Владилен-иԥа Кириенко, Алада-Уаԥстәыла Ареспублика Ахада Алан Едуард-иԥа Гаглоев, Урыстәылатәи Афедерациа асубиектқәа рхадацәа, Урыстәыла афедералтә усбарҭақәа рнапхгаҩцәа, иара убас анаплакқәа, абанкқәа, аустә хеилакқәа рхаҭарнакцәа.
Афорум аихшьалақәа, ҳәарада, аекономика аҿиараҟны, аинвестициа адыԥхьалара аус аизырҳараҟны аҵак ду рыманы иҟалоит. Урҭ аԥхьаҟа амҩатә хсаалаҵас хархәара рыҭахоит, иҟаҵатәу ашьаҿақәеи иаҳзеиԥшу апроектқәа рынагӡареи рыҟны шьаҭас ироуеит.
Афорум аҟны ҳнапы зҵаҳҩыз аиқәшаҳаҭрақәа хымԥада аинвестициатә аԥшьгарақәа, анаплак ҿыцқәа, аинфраструктуратә проектқәа уҳәа, аекономикатә усеицура аҳәаақәа рырҭбаараҟны хархәара рыманы иҟалоит.
Аихшьала ҟаҵо, аус ҳацызуа зегьы иҭабуп ҳәа расҳәарц сҭахуп конструктивла имҩаԥаҳгаз аусеицуразы. Сара агәра згоит ҳнапы зҵаҳҩыз аиқәшаҳаҭрақәа хымԥада аԥсҭазаара ишаларҵәахо.
Ҳҿаԥхьа иқәгылоуп зыҿҳәара неиҵыху ауснагӡатәқәа - Аԥсны жәларбжьаратәи аренаҟны аҵакы арӷәӷәара, аԥхьаҟатәи аԥсны-урыстәылатәи аекономикатә усеицура амҽхак арҭбаара. Арҭ ауснагӡатәқәа рынагӡара алыршахоит аҳәынҭқарра, абизнес, аҭҵаарадырратә уаажәларра рымчқәа реидкыларала. Сгәы иаанагоит ари амҩаҟны ҳфорум акрызҵазкуа шьаҿаны иҟалеит ҳәа.
Анаҩстәи жәларбжьаратәи аекономикатә форум "Аԥсны - аԥеиԥш аинвестициа алагалара" ҩышықәса рышьҭахь имҩаԥысраны иҟоуп. Уи иалахәхо, аус ҳацызуа рхыԥхьаӡарагьы иазҳауеит ҳәа сгәы иаанагоит.
Даҽазныкгьы иҭабуп ҳәа шәасҳәоит ҳусеицуразы, ҩаԥхьа Аԥсны ҳаиқәшәараҟынӡа! Абзиараз!