Ҳаҭыр зқәу адҵаҟаҵаҩцәа , арҵаҩцәа, акурсантцәа, Аҟәатәи иреиҳаӡоу азеиԥшарратә командатә ҵараиурҭа аушьҭымҭацәа!
Ишәыдысныҳәалоит аҵараиурҭа аԥҵоижьҭеи 25 шықәса аҵра арыцхә. Арҭ ашықәсқәа зегьы Аҟәатәи азеиԥшарратә командатә ҵараиурҭа Аԥсны арратә ҵараиура асистемаҟны аҵак ду змоу хәҭаны иҟоуп, ҳар рзы аофицертә кадрқәа разыҟаҵара аус уасхырс иазышьҭоуп.
Аҵараиурҭа аушьҭымҭацәа Ҳреспублика Арбџьар мчқәа рыҟны хьыӡла-ԥшала аррамаҵзура иахысуеит. Иҟоуп Урыстәылатәи Афедерациа иреиҳаӡоу арратә ҵараиурҭақәа рыҟны зҵара иацызҵогьы.
Иҭабуп ҳәа расҳәоит арҵаҩратә еилазаара зегьы, акурсантцәа азыҟаҵара бзиа рызҭо аҵараиурҭа анапхгара, Зыԥсадгьыл гәык-ԥсык ала иазыҟоу аофицерцәа рааӡараҟны рлагаламҭазы.
Ишәзеиӷьасшьоит зегьы агәабзиара, ахачҳара, Аԥсны Аҳәынҭқарра аизҳазыӷьара иазку амаҵзуреи арҵареи рус аҟны аихьӡарақәа.