Аофициалтә усмҩаҧгатә хацыркын Аҟәа ақ. идырым асолдаҭ имемориал аҟны ашәҭқәа рышьҭаҵарала.

Анаҩс, Аиааира иазкыз аиубилеи аҟны ажәахә ҟаҵаны дықәгылеит Ахада ихаҭыҧуаҩ  Бигәаа Беслан. Аветеранцәеи Аҧсны атәылауааи рахь ааҧхьара ҟаҵо иазгәеиҭеит, ари аныҳәа ҧшьа афырхаҵареи Аҧсадгьыл абзиабареи ишырсимволу. "Ҳабацәеи ҳабдуцәеи рфырхаҵара, афронтқәа рыҟны еибашьуаз 55 нызқьҩык Аҧсны аҧацәеи аҧҳацәеи ргәымшәара ҿырҧшыганы иаанхоит ахааназы. 17 нызқьҩык рыҧсҭазаара ахақәиҭра иахҭнырҵеит",- иҳәеит иара.

Аҳәынҭқарра Ахада ихаҭыҧуаҩ иазгәеиҭеит 1992-93ш.ш. Аҧсны жәлар ҩаҧхьа афашизм иаҿагыланы ақәҧаразы ишгылаз, аиааирагьы шыргаз.

"Иахьа анацизм аиҭаҿиара аҽазнашәоит, Урыстәыла уи иаҿагыланы иқәҧоит. Ҳара ҳарҧарцәа Иҷыдоу арратә аоперациаҟны еибашьуеит, ҳаидгылара хымҧада аиааира ааигәанатәуеит",- ациҵеит Бигәаа.
Анаҩс, Аҟәа Амшын еиқәа аҧшаҳәаҟны  имҩаҧысит  апарад "Ҧсра зқәым аполк" аколоннақәа злахәыз.
Аныҳәатә усмҩаҧгатә иалахәын Аҧыза-министр Делба Владимир, Жәлар Реизара Ахантәаҩы Ашәба Лаша, Аҧсны иҟоу Урыстәылатәи Афедерациа ацҳаржәҳәаҩ  Михаил Шургалин, аиҳабыра рхаҭарнакцәа, Апарламент адепутатцәа, адинхаҵара ахаҭарнакцәа, ауаажәлар.