▫️ Аԥсны Ахада Гәынба Бадра Урыстәыла Ахада Иадминистрациа Анапхгаҩы Актәи ихаҭыԥуаҩ Сергеи Кириенко иҭабуп ҳәа иеиҳәеит Аҟәа аҳаирбаӷәаза аартреи Аԥсны аҿиараҟны ацхыраареи рзы:

 ▫️ «Ари, аиашазы, ҳтәыла аҿиараҟны аамҭа ҿыцуп, уи Урыстәылатәи Афедерациа ахада Владимир Владимир-иԥа Путин иӡбамҭада ҟалашьа амамызт. Издыруеит шәара ишәыцны иахьа ишаҳҭааз хыԥхьаӡара рацәала аекспертцәа, абизнесуаа, арегионқәа рнапхгаҩцәа — арҭ аимадарақәа акырӡа аҵанакуеит ҳтәылақәа реизыҟазаашьа арӷәӷәаразы», — иҳәеит Гәынба Бадра аиԥылараҿы.

▫️ Аганқәа азааҭгылеит Аԥсни Урыстәылеи русеицура ахырхарҭа хадақәа, асоциалтә, аекономикатә, аинфраструктуратә усхкқәа рҟны еицырзеиԥшу апроектқәа рынагӡарагьы налаҵаны. Ҩ-ганктәи аизыҟазаашьақәа ццакны рыҿиара шьақәзырӷәӷәо акәны иҟоуп аҵыхәтәантәи ашықәсқәа рзы иҳауз иалкаау алҵшәақәа рыла.

▫️ «Жәаҳәарада, аусеицура аҿиара иацхраауеит Урыстәыла Ахада иӡбамҭа, иареи шәареи шәеиқәшәара аихшьаалақәеи, иҳабжьоу аиқәшаҳаҭрақәеи. Владимир Владимир - иԥа ахылаԥшра аиҭоит, иара изы Урыстәылеи Аԥсни русеицура аҿиара акрызҵазкуа хырхарҭоуп. Иахьа ҵыԥх имҩаԥысыз шәинаугурациа аахыс шықәсык ҵит, ари ашықәс иалагӡаны ареспубликаҿы зҽызыԥсахыз даара ирацәоуп. Аха ҳаԥхьаҟа ишьҭоуп аус дуқәа, зымҽхак ҭбаау аиҭакрақәа уажәоуп ианхацыркхаз», — иҳәеит аиԥылараҿы Сергеи Кириенко.

▫️   Аганқәа иазгәарҭеит арҭ амшқәа рзы Аԥсны имҩаԥысуа Жәларбжьаратәи аекономикатә форум алҵшәақәа убартә ишыҟало.