▫️ Аиԥылараан Бадра Гәынба иазгәеиҭеит аԥсны-урыстәылатәи аусеицура аҩаӡара ҳараки ирццакны аҿиара ишаҿуи, инаҵшьны ҳазҭагылоу аамҭазы Аԥсны Аҳәынҭқарра асоциал-економикатә ҿиареи аҩ-ҳәынҭқаррак рыбжьара аинырра арӷәӷәареи ирызку еицырзеиԥшу апроект дуқәа жәпакы рынагӡара шымҩаԥысуеи.

▫️ Аиԥылара атема хадақәа ируакхеит Аԥсны Аҳәынҭқарра асоциал-економикатә ҿиара ацхрааразы аинвестициатә программа анагӡара. Апрограмма аҳәаақәа ирҭагӡаны иазԥхьагәаҭоуп 34 усмҩаԥгатә, урҭ рхыԥхьаӡараҿы иҟоуп ареспубликатә хәыҷтәы хәышәтәырҭа аргылара, амузыкатә ҵараиурҭа аргылареи аиҭашьақәыргылареи, амҩатә инфраструктура аиҭашьақәыргылара. Ҷыдала, иазԥхьагәаҭоуп амҩатә инфраструктура аобиектқәа 22 рынагӡара.

▫️ Аҳәынҭқарра Ахада иара убас иазгәеиҭеит аинвестициатә программа аҳәаақәа рынҭыҵ инагӡахо апроектқәа. Урҭ рхыԥхьаӡараҿы иҟоуп анаплак маҷи абжьаратә наплакреи рыдгылара, анхарҭа маҷ аобиектқәа рыҿиара, аглемпингқәагьы уахь иналаҵаны, иара убас ашколқәа рҿы ахәы ԥха аиҿкаара.

▫️ Бадра Гәынба Урыстәылатәи Афедерациа Ахада Владимир Путин иҭабуп ҳәа иеиҳәеит актәи акласс инаркны аԥшьбатәи акласс аҟынӡа аҵаҩцәа рзы хәыда-ԥсада ахәы ԥха аиҿкааразы ирыдыркылаз аӡбамҭазы.
   
 

Аԥсны ахада иазгәеиҭеит ари ахырхарҭа аҵак ду шамоу, инаҵшьны иазгәеиҭеит Аԥсны Аҳәынҭқарра алшарақәа рҳәаа иҭагӡаны иара убас аҳәынҭқарратә биуџьет аҟынтә апроект анагӡаразы аԥара шазоужьхо.

▫️ Аҳәынҭқарра Ахада иазгәеиҭеит Урыстәылатәи Афедерациа Ахада Иадминистрациа Анапхгаҩы Актәи ихаҭыԥуаҩ Сергеи Кириенко илагала ҷыда, уи иааиԥмырҟьаӡакәа еицырзеиԥшу амшхәаԥштә дшалахәу, Аԥсни Урыстәылеи рҿаԥхьа иқәгылоу актуалра зҵоу азҵаарақәеи ахыдҵақәеи рынагӡара ҷыдала зҿлымҳара шаиҭо.

▫️ Хазы Бадра Гәынба иазгәеиҭеит имаҷуи ибжьаратәуи анаплакра апрограмма аҳәынҭқарра аганахьала адгылара шамоу. Иара иажәақәа рыла, апроект нагӡоуп, иубартә иҟоуп иаанарԥшхьоу аекономикатә лҵшәа.

▫️ Аҳәынҭқарра Ахада иара убас дазааҭгыланы иҳәеит анаплакыҩцәа анхарҭа маҷ змоу аобиектқәа — аглемпингқәа раԥҵаразы апроект аинтерес ду шрымоу. Раԥхьатәи ааамҭахәҭаан алахәцәа реизгаразы ауадаҩрақәа цәырҵуазҭгьы, иахьа апроект алахәхаразы аҭаххара раԥхьа иарбаз арбагақәа раасҭа акыр еиҳауп.

▫️ Акрызҵазкуа даҽа хырхарҭаны иҟалеит Аԥснытәи аҳәынҭқарратә телехәаԥшра аусуразы ҳаамҭазтәи аҭагылазаашьақәа раԥҵара. Бадра Гәынба иазгәеиҭеит Аԥснытәи аҳәынҭқарратә телехәаԥшразы амодультә хыбра аиҭашьақәыргылареи аргылареи рзы аӡбамҭа шрыдыркылаз. Аҳәынҭқарра Ахада иажәақәа рыла, ари апроект аҵак ҷыда амоуп амилаҭтә телехәаԥшра аҭоурыхтә роль ҳасаб азуны.

▫️ Аусеицура ахырхарҭақәа рхыԥхьаӡараҿы иара убас иазааҭгылан аенергетика азҵаарақәа.

▫️ Сергеи Назаров иазгәеиҭеит Урыстәылатәи Афедерациа Ахада Иадминистрациеи Урыстәыла Аиҳабыреи активла излахәу Аԥсни Урыстәылеи русеицура аҩаӡара шыҳараку. Иҳәеит уи аԥхьа изҵаҩыз аиҳабырабжьаратә комиссиа аӡбамҭа ҿыц атәы, уа ишаныԥшыз ԥаса ирыбжьарҵахьаз аиқәшаҳаҭрақәа рыла иалыршаз.

▫ ️ «Убри аҟнытә, уи инақәыршәаны, уажәы Шәареи ҳареи, Аиҳабыреи ҳазлацәажәоз агәҭакқәа рынагӡаразы ҳаиқәшәаны аусура ҳалагоит», — иҳәеит Сергеи Назаров.

▫️ Аминистр ихаҭыԥуаҩ инарҭбааны дырзааҭгылеит Урыстәылеи Аԥсни русеицура аҳәаақәа ирҭагӡаны ҳазҭагылоу аамҭазы имҩаԥырго егьырҭ акрызҵазкуа аекономикатә, аинфраструктуратә, асоциалтә проектқәа.