Аҟәа имҩаԥысит Аԥсны Аҳәынҭқарра амҩатә усхк ахаҭарнакцәа алархәны аусуратә еилацәажәара. Иазааҭгылеит атранспорттә инфраструктура арҿиара иазку актуалра злоу азҵаарақәа, арҽеиратә усура иаҳа иалкааны иахьаҭаху аҭыԥқәеи амҩатә еилазаарақәа аус рыцуреи инарымаданы.   

Ҷыдала хшыҩзышьҭра азун аусурақәа рхаҭабзиареи рымҩаԥгара аҿҳәареи, иара убас хархәара зызу амаҵзурақәа зегьы лыҵшәазмоу русеицуреи.    

Аԥсны анхарҭа ҭыԥқәа рыҟны амҩа еибаркырақәа рырҽеиреи реиҭашьақәыргылареи рзы афедералтә биуџьет аҟнытә афинанс зоужьра ззалыршахо (1 млрд мааҭк) апрограмма аҳәаақәа ирҭагӡаны 2025 шықәсазы ихацыркхоит Кәыдрытәи аҩхааҟны амҩатә инфраструктура аиҭашьақәыргыларазы актәи амҭахҵәаха. Уи ахәԥса иартәоит 205,5 млн мааҭ, аусурақәа зегьы рхыркәшара арбоуп 2026 шықәса ԥхынҷкәынмзазы.

Иара убас иазԥхьагәаҭоуп шьаҭанкылатәи арҽеиратә усурақәа амҩатә обиектқәа 21, зеиԥшҵакырала 198 832 ԥшь. м. Аусурақәа зегьы зегьы рхыркәшара арбоуп 2025 шықәса нҵәаанӡа ҳәа

Апроект-харџьынҵатә документациа зегьы рхиоуп, аобиектқәа рыхәԥса шьақәырӷәӷәоуп Краснодартәи атәылаҿацә Аҳәынҭқарратә автономтә усбарҭа «Краснодаркраигосекспертиза» ала. Аусурақәа рымҩаԥгаразы аҭыԥантәи анардадкылатә еиҿкаарақәа радԥхьалара азԥхьагәаҭоуп: ЗҲӘА «Аԥснырегионргылара», ЗҲӘА «ИҷыдоуАмҩаРгылара», ЗҲӘА «ДСК», Иаку арегионалтә усбарҭа «Аԥсныавтомҩа ДРСУ 1». Убри аан анардадкылаҩцәа аус рулоит Урысавтомҩа аспециалистцәа рекспорттә хылаԥшрала. 

Ишәгәалаҳаршәоит, Урыстәыла Аԥсны комплексла адгылара шанаҭо амҩатә усхк арҿиареи арҿыцреи рыҟны. Урыстәыла ацхыраарала Ареспубликаҟны амҩақәа рырҿыцразы аусурақәа мҩаԥысуеит – ари акырӡа аныҟәараан аманшәалареи ашәарҭадара ашьақәыргылареи алнаршоит, иара убас атуристтә аамҭазы атранспорттә еидара еиҵанатәуеит.