Ҳаҭыр зқәу Афорум иалахәу зегьы!
Акыр иаԥсоу асасцәа!
Сара сзы аҵак ду амоуп иахьатәи XII-тәи Аҭоурыхдырҩцәа-кавказҭҵааҩцәа жәларбжьаратәи рфорум алахәра.
Жәларбжьаратәи афорум Аԥсны иеизнагеит иналукааша аҭҵааҩцәа, Аԥсни Урыстәылеи рыҭҵаарадырратә уаажәларра ахаҭарнакцәа.
Ҷыдала иазгәасҭарц сҭахуп афорум амҩаԥгара зызку акрызҵазкуа х-иубилеитә рыцхәк реиқәшәара иамоу асимволтә ҵакы.
Сынтәа ҳара иазгәаҳҭоит Аџьынџьтәылатә еибашьра дуӡӡаҟны Аиааира 80 шықәса ахыҵра. Асовет Еидгыла егьырҭ ажәларқәа реиԥш, ари аибашьраҟны Аиааира агараҿы рлагаламҭа дуӡӡоуп иара убас Аԥсны жәлар.
Иаацқьаны 80 шықәса раԥхьа, Аиааира Ду ашықәсан диит зыхьӡ наунагӡа Аԥсны аҭоурых ианылаз, – Аԥсны Аҳәынҭқарра Актәи Ахада, иналукааша аҵарауаҩ, ҳмилаҭ рԥыза ду Владислав Григори-иԥа Арӡынба. Аиааира иалиааз, анаҩс Аԥсны Аџьынџьтәылатә еибашьраҟны Аиааира иасимволхаз!
Ахԥатәи иубилеитә рыцхәуп Дырмит Иосиф-иԥа Гәлиа ихьӡ зху Аԥсуаҭҵааратә институт 100 шықәса ахыҵра. Ари ҳмилаҭтә культура, ҳбызшәа, ҳҭоурых реиқәырхареи рырҿиареи рыҟны ароль дуӡӡа назыгӡо ижәытәӡоу ҭҵаарадырратә усҳәарҭоуп. Абри аинститут ҳажәлар рзы иуадаҩыз аамҭақәа раан напхгара аиҭон Владислав Григори-иԥа Арӡынба.
Ҷыдала аҵак ду амоуп ҳара ҳзы ҳфорум иахьалахәу Урыстәылатәи аҭҵаарадыррақәа ракадемиа Мрагылараҭҵаара аинститут ахаҭарнакцәа-аҵарауаа. Иҳәатәуп, ари аинститут аҟны акыр шықәса аус шиухьаз Владислав Григори-иԥа Арӡынба. Абра иагьышьақәгылеит Мрагылареи Кавкази рҭоурыхи ркультуреи рыҭҵааҩы иаҳасабала ихьӡ ҳаракы.
Аԥсни Урыстәылеи рыҭҵаарадырратә усбарҭақәа русеицура ҳара ҳахәаԥшуеит акрызҵазкуа астратегиатә хырхарҭа аҳасабала. Уи аҵак дуӡӡа амоуп аҭоурых аиқәырхареи кавказҭҵаараҟны азеиԥш знеишьақәа рзы, ажәларқәа рыҿиаразы хәы змаӡам апринципқәа абиԥара ҿыцқәа рымадаразы.
Сгәы иаанагоит, ари Афорум Кавказ ажәларқәа рҭоурых, ркультура, рполитика иадҳәалоу акрызҵазкуа атемақәа инарҵауланы рыҭҵаара ахьымҩаԥысуа ҭыԥхоит ҳәа. Иҟалааит уи аусура ҳтәыла акультуратә ҭынха ду аиқәырхареи арҿиареи рзы лагаламҭа дуны.
Акыр иаԥсоу аҩызцәа!
Ишәзеиӷьасшьоит лыҵшәа змоу аусура, аартра ҿыцқәа, аихьӡарақәа!