Ахада Ихаҭыԥуаҩ Бигәаа Беслан  иқәгылараҟны иаҵшьны иҳәеит атәыла азанааҭтә лшара арҭбааразы акрызҵазкуа ашьаҿа шыҟаҵоу.

«Иахьа Аԥснытәи аҳәынҭқарратә университет аҟны имҩаԥысуеит аҵак ду змоу, Адыррақәа рцентр ааартра иазку ахҭыс. Ари аҵараиуратә проект иҿыцны иахьыҟоу адагьы, атәыла азанааҭтә лшара арҭбааразы аҵак ду змоу шьаҿаны иҟалеит. Астудентцәа алшара ҿыцқәа рзаазыртуа, Аԥсни Урыстәылеи рҵараиуратә наӡаӡаара еизааигәазтәуа шьаҿа бзианы иҟоуп. 

Аусеицура аҳәаақәа ирҭагӡаны атуристтә усхк арҿиара иазынархоу аицлабра «Асас изыԥшу Аԥсны» ҳекономиказы ихадароу аусхкқәа ируакуп», –  иҳәеит Бигәаа Беслан.

Ахада Ихаҭыԥуаҩ иҳәеит Адыррақәа рцентр аҟны астудентцәа ироуа адыррақәа зыквалификациа ҳараку аспециалистцәа разыҟаҵаразы уасхыр ӷәӷәаны ишыҟало.

 «Атәыла анапхгара ахьӡала Аԥснытәи аҳәынҭқарратә университет аректор, аплатформа «Асас изыԥшу Аԥсны» иҭабуп ҳәа раҳҳәоит аҵак ду змоу ари апроект анагӡараҟны аусеицуразы», - иҳәеит Бигәаа Беслан.