▫️А

▫️

▫️ Аԥсны Аҳәынҭқарра Ахада Гәынба Бадреи Урыстәыла Ахада Иадминистрациа Анапхгаҩы Актәи ихаҭыԥуаҩ Сергеи Кириенко аҳаирбаӷәаза иаҭааит, ахәыҷтәы сахьаркыратә цәыргақәҵа «Аҟәа иахаԥыруа амҵәыжәҩақәа: Аиҩызара ацҳа» афиналистцәа русумҭақәа ирыхәаԥшит.    ▫️ Аицлабра мҩаԥысуан аноминациақәа хԥа рыла: «Аԥсны ажәҩан», «Арӡынба Иҳаирбаӷәаза», «Аиҩызара ацҳа: Урыстәыла – Аԥсны». Зынӡа иалкаауп аԥхьахәқәа згаз 27-ҩык, иара убас иазгәаҭоуп анапкымҭақәа 7, иранашьоуп аҳаирбаӷәазаҟнытә ҷыдала аԥхьахә. Актәи аҭыԥқәа аанызкылаз Москваҟа ацаразы алшара рыҭахоит Амилаҭтә центр «Урыстәыла» иаҭаарц азы.   

▫️

Жәларбжьаратәи атеатр амш аҽны аҳәынҭқарра Ахада Гәынба Бадра иԥшәмаԥҳәыс Ҳашыг Ирма дицны Самсон Ҷанба ихьӡ зху Аԥснытәи аҳәынҭқарратә драматә театр даҭааит. Амассатә информациа ахархәагақәа рыҟны икьыԥхьыз адныҳәалараҟны Ахада инаҵшьны иазгәеиҭеит атеатр иҵаулоу ахәыцрақәа ахьиуа, зыԥсы ҭоу аабиԥарақәа реимадара аԥсы ахьҭоу адоуҳатә еимадаразы иҷыду ҭыԥны ишыҟоу.  Гәынба Бадра иазгәеиҭеит Аԥсны атеатрқәа русура иамоу аҵак ҷыда - Самсон Ҷанба ихьӡ зху Аԥсуа ҳәынҭқарратә драматә театр, Фазиль Искандер ихьӡ зху Аурыс драма атеатр, Шәарах Ԥачалиа ихьӡ зху Тҟәарчалтәи акомедиа атеатр ҳмилаҭтә культура аҿиареи, ҳажәлар рхатәы бызшәеи ркультуратә ҭынхеи  реиқәырхараҟны рлагала шдуу. Аҳәынҭқарра Ахада иҳәеит атеатр аусзуцәа рааԥсара шырацәоу, гәык-ԥсык ала аҟазара ишазыҟоу. Ақәыргыламҭа ссирқәа аԥҵо, дара атәыла акультура ахьдырбеио адагьы, урҭ ахәаԥшцәа рааӡоит, иреиӷьу рцәаныррақәеи рхәыцрақәеи рҿыхо. Ахада ирзеиӷьеишьеит агәзабзиара, агәамч, арҿиаратә еихьӡара ҿыцқәа, ахәаԥшцәа бзиақәа. Ари ашықәс азы Аԥсуа ҳәынҭқарратә драматә театр имҩаԥнагоит 95-тәи атеатралтә аамҭа. Иахьа ахәаԥшцәа идырбан иеицырдыруа Алада Уаԥстәылатәи арежиссиор Ҭамерлан Ӡудцов иқәыргыламҭа "Аҳәынҭқар ҟьантаз". Аҳәынҭқарра Ахада Аусԥҟа инапы аҵаиҩит Аԥсны Аҳәынҭқарреи Алада Уаԥстәыла Ареспубликеи рыбжьара акультуратә еимадарақәа рырӷәӷәара аус аҟны илагаламҭазы Ҭамерлан Ӡудцов "Аԥсны Аҳәынҭқарра аҟазара зҽаԥсазтәыз аусзуҩ" ҳәа ахьӡ ихҵаразы.      

▫️

Аԥсны Аҳәынҭқарра Ахада Гәынба Бадра Атеатр жәларбжьаратәи амш азы адныҳәалара ҟаиҵеит. Ҳаҭыр зқәу атеатр аусзуҩцәа! Гәык-ԥсыкала ишәыдысныҳәалоит Атеатр жәларбжьаратәи амш! Атеатр еснагь адоуҳатә еиҿцааразы иҷыдоу ҭыԥны иҟан, уи ус иагьаанхоит, уа ииуеит иҵаулоу ахшыҩҵакқәа, ишьақәгылоит хра злоу аҵасқәа, абиԥарақәа реимадара еиқәхоит. Атеатртә ҟазара ихадоу ароль нанагӡоит акультура аҿиараҿы, ауаҩы иҩнуҵҟатәи идунеи арбеиараҿы, ауаажәларра иреиӷьу рҟазшьатә ҷыдарақәа рырӷәӷәараҿы. Аҵак ҷыда амоуп Аԥсны атеатрқәа — Самсон Ҷанба ихьӡ зху Аԥсуа ҳәынҭқарратә драматә театр, Фазиль Искандер ихьӡ зху Аурыс драма атеатр, Аҳәынҭқарратә аҿартә театр, Шәарах Ԥачалиа ихьӡ зху Тҟәарчалтәи акомедиа атеатр русура. Амилаҭтә культуреи, ахатәы бызшәеи реиқәырхареи рырҿиареи, ажәлар рдоуҳатә традициақәеи ркультуратә ҭынхеи рырӷәӷәараҿы хәы змаӡам алагала ҟашәҵоит. Шәбаҩхатәреи, шәус гәык-ԥсыкала азыҟазаареи, еснагь иаашәырԥшуа арҿиаратә ԥшаареи ирыбзоураны асценаҿы аҭоурых аԥсы ҭалоит, аԥсуа культура абеиарақәа ааԥшуеит, ҳаамҭазтәи атәыла акультуратә наӡааӡарақәа шьақәгылоит. Шәара шәнапы злаку аус иаҭахуп ахамеигӡареи аҟазара гәыкала абзиабареи. Шәара иаԥышәҵо иналукааша ақәгыларақәа рыдагьы, ахәаԥшҩы иҿы иреиӷьу ацәаныррақәеи ахшыҩҵакқәеи шәырҿыхоит. Гәык-ԥсыкала ишәзеиӷьасшьоит агәабзиара, иҿымцәаауа арҿиаратә гәацԥыҳәара, ақәыргыламҭа шьахәқәа, аџьшьара шәызҭо ахәаԥшцәа, аҟазара амаҵ аураҿы ԥхьаҟатәи ақәҿиарақәа!